Ўзбекистон президенти Шавкат Мирзиёев 27 июнь куни «Электр энергияси ва табиий газни назорат қилиш ва ҳисоблашнинг автоматлаштирилган тизимини янада жорий этиш бўйича таклифларни тайёрлаш чора-тадбирлари тўғрисида»ги фармойишини имзолади.

Унга кўра, Бош вазир ўринбосари Жамшид Қўчқоров раҳбарлигидаги Электр энергияси ва табиий газни назорат қилиш ва ҳисоблашнинг автоматлаштирилган тизимини жорий этиш бўйича таклифларни тайёрлаш билан шуғулланувчи ишчи комиссия тузилади.

Комиссияга илғор хорижий тажрибаларни ўрганиб, умумий тизимга бирлаштирилган автоматлаштирилган тизимлар ва ускуналар ҳисобини юритиш бўйича ягона норматив-техник талаблар, давлат стандартларини тасдиқлаш юзасидан таклифларни тайёрлаш вазифаси топширилди.

Ўрганиш натижалари асосида Ўзбекистонда автоматлаштирилган тизимларни жорий қилиш концепцияси ишлаб чиқилади.

Хорижлик ҳамкорларни жалб этган ҳолда электр энергияси ва газ ҳисобини юритувчи замонавий электрон ускуналар, улар учун тегишли дастурий маҳсулотлар ишлаб чиқариш маҳаллийлаштирилади.

Лойиҳаларга маҳаллий ишлаб чиқарувчилар ва молиявий маблағларни жалб қилиш режалаштирилган. Жумладан, транспорт-логистика хизматлари, радио ва мобиль алоқа хизматларини такомиллаштириш ҳисобидан мамлакатда автоматлаштирилган тизимларнинг самарали фаолияти учун зарур бўлган инфратузилмаларни ривожлантириш лозим.

2 ой муддат ичида президент девонига белгиланган вазифаларни амалга оширишга йўналтирилган аниқ таклифлар ва норматив-ҳуқуқий актлар лойиҳалари киритилиши белгиланган.