«Ўзбекэнерго» акциядорлик жамияти 2017 йил 15 июлдан электр энергияси нархлари ошишини маълум қилди. Янги нархлар Молия вазирлиги томонидан 29 июнь куни тасдиқланган.

Қайд этилишича, 1 киловатт/соат электр энергия нархи 7 фоизга ўсиб, 191 сўмдан 204,3 сўмга чиқади.

Тарифларнинг тўлиқ рўйхати билан ушбу ҳавола орқали танишиш мумкин.

«Ўзбекэнерго»нинг изоҳлашича, электр энергия тарифларининг қимматлашуви ёқилғи-энергия бойликларининг таннархи ошиши билан боғлиқдир.

Бундан олдинроқ 15 июлдан газ тарифи ҳам 7 фоизга ошиши ҳақида хабар берилганди.

Коммунал хизматларнинг тарифлари сўнгги бор 2016 йил октябрь ойида оширилган эди.

Эслатиб ўтамиз, шу йил мартида Молия вазирлиги 2017 йил давомида коммунал хизматларнинг тарифлари оширилмаслигини билдирганди.

Эндиликда ички бозорда нархлар барқарорлигини таъминлаш мақсадида тарифлар оширилиши ўртача йиллик инфляция даражасидан ошмаслиги, шу билан бирга иссиқлик ва сув таъминоти хизматларини кўрсатадиган корхоналарнинг харажатларини камайтириш ҳамда иш самарадорлигини ошириш мақсадида ҳукумат томонидан комплекс чора-тадбирлар амалга оширилаётгани айтиб ўтилганди.