Украина президенти Петро Порошенко мамлакатда русларнинг «ВКонтакте» ижтимоий тармоғига қўйилган тўсиқни бекор қилишни истамади. Давлат раҳбари сайтида шу масалада йўлланган ва 25 мингдан ортиқ киши имзолаган петицияга рад жавоби қайтарилган.

«ВКонтакте» интернет-ресурсини блокдан чиқариш сўралган электрон петицияни маъқуллаш имконсиз иш», — дейилган сўров муаллифларига жавобда.

Порошенконинг қайд этишича, бу ижтимоий тармоқ бошқа қатор сайтлар билан биргаликда «Россия махсус хизматлари томонидан Украина ва унинг фуқароларига қарши ташвиқот воситаси сифатида фойдаланилади».

«Русларнинг интернет тармоқларида минглаб украиналик фойдаланувчилар Украинага қарши ташвиқотда «винтчалар» каби фойдаланилади», — деган Порошенко.

16 май куни Украинада «ВКонтакте» ва «Одноклассники» ижтимоий тармоқлари, шунингдек, «Яндекс»нинг барча хизматларига тўсиқ қўйилганди. Шунингдек, «Лаборатория Касперского» ва DrWeb аксилвирус компаниялари сайтлари ҳам блокировка қилинди. Блокировка 3 йил муддатга жорий қилинган.

Украина Миллий хавфсизлик ва мудофаа кенгаши ахборот хавфсизлиги масалалари хизмати раҳбари Валентин Петров Украинада «ВКонтакте», «Одноклассники» ва «Яндекс» блокировка қилиниши мазкур сервислар фойдаланувчиларининг шахсий маълумотлари Россияда сақланиши билан боғлиқлигини маълум қилди.