Сербия парламенти мамлакат бош вазири лавозимига Ана Брнабични сайлади. Очиқ овоз бериш давомида мамлакат президенти Александар Вучич томондан илгари сурилган Брнабич ва унинг маҳкамаси учун 157 нафар депутат овоз берган, 55 депутат эса қарши чиққан. 38 депутат овоз бериш жараёнида бўлмаган. 

Бош вазир этиб сайланиш учун 250 депутатдан оддий кўпчилик (камида 126 та овоз) овоз берилиши кифоя қилади.

29 июнда янги ҳукумат қасамёд келтирди. Маросим тантанали равишда президент, хорижий элчихоналар вакиллари, қироллик уйи аъзолари, депутатлар иштирокида ўтди. Маросимда Сербия православ черкови патриархи Ириней ва диний идоралар вакиллари иштирок этишмаган, улар янги бош вазирнинг ноанъанавий ориентацияга эгалиги сабабли маросимга бойкот эълон қилишган.     

Вазирлар жўр бўлиб қасамёд матнини ўқишган ва навбат билан ҳужжат матнига имзо қўйишган. Мамлакатнинг янги вазирлар маҳкамаси аввалги ҳукуматдагидан 2 та кўпроқ вазирлик, яъни 18 та вазирликдан иборат бўлади. Янги вазирлар маҳкамаси сайланиши олдидан атроф-муҳитни муҳофаза қилиш ва Сербиянинг Европа билан интеграцияси вазирликлари яратилиши ҳақидаги қонун қабул қилинган.