“Республика Ота Юрт” партияси қурултойи парламентдаги мухолифат етакчиси, Қирғизистон собиқ бош вазири Омурбек Бабанов номзодини мамлакат президентлиги учун илгари сурди. Бу ҳақда РИА Новости хабар тарқатган.

Қирғизистонда президентлик сайловлари 15 октябрь куни бўлиб ўтади. Амалдаги президенти Алмазбек Атамбоев ўз лавозимини тарк этмоқда. Бугунги кунда Қирғизистон МСКга сайлов пойгасида иштирок этиш борасида 11 киши мурожаат қилган.

Қирғизистон собиқ бош вазири Омурбек Бабанов. Фото: РИА "Новости"

“Республика Ота Юрт” партияси етакчиси, 47 ёшли Бабанов – республикадаги энг бадавлат шахсларнинг топ-100лигига кирувчи тадбиркор. У инқирозларга қарши курашувчи менежер сифатида танилган. Хабарларга кўра, у мамлакатда иқтисодий ислоҳотларни ўтказиши, иш ўринларини яратиши ва республикага хорижда ишловчи юз минглаб меҳнат мигрантларини қайтариши мумкин. 

"Россия бизга шунчаки дўстона давлат эмас. Бу бизнинг стратегик шеригимиз, биз тарихан бирга бўлганмиз ва келажакда ҳам бирга бўламиз”, - деган Бабанов. Унинг таъкидлашича, самарали ташқи сиёсат тарафдори - "бизга нафақат давлатимиз ичидаги, балки чегараларимиздаги тинчлик ҳам керак".

Маълумот учун, Бабанов Қирғизистондаги 2010 йилнинг апрель инқилоби етакчилардан бири бўлган.