Россия президенти Владимир Путин 1 июлда Москвада турар-жой биноларининг оммавий бузилишини назарда тутувчи реновация дастури ҳақидаги қонунни имзолади.

Ушбу дастур Москвада биринчи навбатда 5 қаватли уйлар аҳолисининг оммавий кўчирилиши ва бу уйларнинг бузилишини назарда тутади. Москва мэри Сергей Собяниннинг айтишича, дастур 15 йилга мўлжалланган. Қонунга кўра, биринчи бўлиб эски уйлар бузилади.

Москва мэрияси дастурга киритилган 4,5 минг уйдан иборат рўйхатни чоп этган. 15 майдан 15 июнгача уйларда яшовчилар орасида "Фаол фуқаро" портали ва "Менинг ҳужжатларим" маркази орқали дастурда иштирок этиш бўйича овоз бериш бўлиб ўтган. Якуний рўйхатга уйнинг бузилиши учун унда яшовчи аҳолининг 3 дан 2 қисмидан кўпроғи овоз берган уйлар кирган.

Дастурда иштирок этишга қарши 460 га яқин уй қарши овоз берган. Мэрияда таъкидланишича, бошида рўйхатда бўлмаган шунчага яқин уй аҳолиси кейинроқ уларни дастурга қўшишни сўрашган.