Самарқанд шаҳридаги Сартепа массиви «Гулистон» маҳалласида яшовчи аҳоли маҳалладаги 158-уйнинг тўртинчи қаватида жойлашган хонадон узоқ йиллардан бери чиқиндилар билан тўлиб ётгани юзасидан шикоят қилди. Бу ҳақда маҳаллий СТВ телеканалининг «Хабарлар» информацион дастури орқали хабар бериб ўтилган. 

Сартепа массиви «Гулистон» маҳалласида 158-кўп қаватли уйда яшовчи Володя Козеннинг уйи узоқ йиллардан буён чиқиндилар билан тўлиб ётибди. Унинг уйи қоп-қоп чиқиндилар уюми билан тўлиши билан бирга, хонадон турли хил ҳашоратларнинг масканига айланган. Уйдан таралётган бадбўй ҳидга инсон чидай олиши қийин.

Қўни-қўшнилар В.Козеннинг уйини дам-бадам тозалаб туришса-да, бироқ бир неча кун ўтгандан сўнг у яна хоналарни чиқиндилар билан тўлдириб ташлар экан. 

Мазкур хонадонга қарама-қарши уйда истиқомат қилувчи қўшнилар унинг уйига умуман кира олмаслигини, уйнинг чиқиндилар билан тўлиб-тошганидан шикоят қилишди. 

Маҳалла фуқаролаори бир неча маротаба санитария эпидимология марказига мурожаат этишган. Бироқ масалани ўрганишга келган мутахассис муаммони шунчаки қўл учида ўрганиб кетишдан нарига ўтмаган.

158-кўп қаватли уйда истиқомат қилувчи аҳолини йиллар давомида қийнаб келаётган яна бир муаммолардан бири шундаки, ушбу уй таъмирталаб бўлиб қолган. Уйнинг деворлари кўчиб, йўлаклар ўйилиб кетган. Бу ерда яшовчи фуқаролар уйнинг чўкаётганлиги сабаб деворлар ёрилиб кетаётганлигидан хавотирда.

Мазкур муаммони ҳал этиш бўйича маҳалла фуқаролари «Сартепа-ҳаёт сервис» ширкатига мурожаат қилишган. Бироқ ширкат раиси фуқароларга доимий равишда «қиламиз», «бажарамиз», деган қуруқ ваъдалар беришдан нарига ўтмаган. 

Ушбу ҳолат юзасидан тегишли ташкилотларга бир неча маротаба мурожаат этилган бўлса-да, бироқ ҳеч қандай натижа бўлмаган. Савол туғилади: ҳар йили куз-қиш мавсумига тайёргарлик кўришда наҳотки бу уй эътибордан четда қолиб кетаверган бўлса? Наҳотки уйни таъмирлашга масъул бўлган мутасадди раҳбарлар шунча йилдан бери ушбу ҳолатга панжа орасидан қараб келишмоқда?

«Гулистон» маҳалласидаги 158-уй фуқаролари ҳамон ўзларни қийнаётган муаммо бўйича мутасадди ташкилотлардан амалий кўмак кўрсатилишини умид билан кутишмоқда.