«Лион» ҳужумчиси Александр Ляказетт тез орада Лондоннинг «Арсенал» клуби сафига ўтиши керак бўлади. Бу ҳақда француз клуби президенти Жан-Мишель Оляс маълум қилган.

«55 млн евро ва қўшимчасига 12 млн евро бонус кўринишидаги матбуотда чоп этилаётган маълумотлар ҳақиқатга тўғри келмайди. «Арсенал»нинг биринчи таклифи 45 млн. евро кўринишида бўлган. Ўйлашимча, савдо 45-50 млн. евро атрофида бўлади. Бу «Арсенал» учун ҳам, «Лион» учун ҳам  рекорд сумма бўлади. Ахир «канонирлар» бир футболчи учун катта харажатлар қилишга одатланишмаган.

Қачон бу трансфер амалга ошади?  Балки шу 1-2 кунларда ҳал бўлиб қолар»,— дея Оляснинг сўзларини келтиради Le Progrès.

Маълумот учун, ўтган мавсумда Ляказетт Франция чемпионатининг 30 учрашувида майдонга тушиб, 28 гол ва 3та голли узатма муаллифи бўлган.