Қатар атрофидада юз бераётган инқирозга қарамасдан, Анқара бу мамлакатдаги ўз ҳарбий иштирокини сақлаб қолади, дея Туркия бош вазири ўринбосари Нўъмон Қуртулмушнинг сўзларини келтирмоқда РИА Новости.

«Туркиянинг Қатардаги ҳарбий базаси нафақат Қатарнинг, балки бутун минтақанинг хавфсизлик масаласидир. Туркиянинг у ердаги ҳарбий иштироки давом этади. Туркиянинг Қатардаги ҳарбий иштирокини минтақадаги сиёсий инқироз билан боғлаш жиддий хатоларга сабаб бўлади», — деган Қуртулмуш Анқарада ўтган матбуот анжуманида.

Унинг қўшимча қилишича, Қатар инқирози «чуқур илдизларга эга эмас ва сунъий ҳосил қилинган», Қатарга нисбатан араб давлатлари қўяётган 13 талаб эса «мустақил давлат учун бажариб бўлмас вазифа».

Қатар билан муносабатларни узган тўрт араб давлати — Саудия Арабистони, БАА, Баҳрайн ва Миср Доҳа учун жорий этилган ультиматум муддатини яна 48 соатга чўзишга рози бўлишган.

Ультиматум 13 талабдан иборат бўлиб, унда Эрон билан дипломатик ва ҳарбий муносабатлар даражасининг пасайтирилиши, Туркиянинг ҳарбий базасини ёпиш, террорчилик ташкилотларини молиялаштиришни бас қилиш, араб давлатларининг ички ишларига аралашишдан ўзини тийиш, мухолифат арбобларини қўллаб-қувватламаслик, шунингдек, «Ал-Жазийра» сунъий йўлдош телеканалини ёпиш каби масалалар кўндаланг қўйилган.

Саудия Арабистони, БАА, Баҳрайн ва Миср 5 июнда Қатарни террорчиликни қўллаб-қувватлаш ва ўзларининг ички ишларига аралашишда айблаб, Доҳа билан дипломатик муносабатларни узишган ва Қатар билан ҳар қандай алоқаларга чек қўйишган. Кейинроқ бу қарорга бир қатор бошқа давлатлар ҳам қўшилишган.