Британиянинг ICO ахборот регулятори Британия миллий соғлиқни сақлаш тизими жамғармаси NHS раҳбарияти Google’га тегишли DeepMind компаниясига тахминан 1,6 млн бемор ҳақидаги маълумотларни тақдим қилганда қонунларни бузган, деган хулосага келди.

Маълум қилинишича, маълумотлар ўткир буйрак етишмаслигини аниқлаш ва ташхислаш тизимини синовдан ўтказиш учун тақдим қилинган. 

"ICO тафтиши маълумотлар билан ишлашда баъзи камчиликларга йўл қўйилганини кўрсатди, жумладан беморлар уларнинг маълумотлари синовлар учун қўлланишидан хабардор этилмаганлар", дейилган хабарда. Компания вакилларидан камчиликларни қонунчиликка мос равишда тўғрилаш сўралган.

DeepMind компанияси 2014 йилдан Google’га тегишли бўлиб, сунъий онгни ривожлантириш билан шуғулланиб келади.