2017 йил “Халқ билан мулоқот ва инсон манфаатлари йили” муносабати билан Жиззах вилоятининг барча туман (шаҳар)ларида “Ҳоким ва ёшлар” учрашувлари бўлиб ўтмоқда. Шундай учрашувлардан навбатдагиси жорий йилнинг 4 июль куни Бахмал туманида бўлиб ўтди.

Учрашувда Жиззах вилоят ҳокими Улуғбек Юлдошевич Узақов, Бахмал туман ҳокими Баҳриддин Ўролович Сафаров, Ўзбекистон Ёшлар иттифоқи Жиззах вилояти Кенгаши раиси Ориф Жумабоевич Шукуров ҳамда вилоят ва туман ташкилотлари раҳбарлари, бошланғич ташкилот етакчилари ва фаол ёшлар иштирок этишди.

Учрашувни О.Шукуров кириш сўзи билан очиб, учрашув мақсади тўғрисида тўхталиб, сўз навбатини Жиззах вилоят ҳокимига берди. У.Узақов ўз сўзида 2017 йил 30 июнда Тошкент шаҳридаги “Симпозимлар” саройида бўлиб ўтган “Камолот” ЁИҲнинг навбатдаги IV Қурултойида Президент томонидан сўзланган нутқнинг мазмун-моҳияти ҳақида ҳамда туманда йўл қўйилган бир қатор хато ва камчиликлар, ўзгаришлар ҳамда амалга оширилиши лозим бўлган вазифалар юзасидан ўз фикрларини билдириб ўтди.

Учрашув давомида бошланғич ташкилот етакчилари ва фаол ёшлар томонидан муаммо ва таклифлари атрофлича қизғин муҳокама этилди.

Бахмал маиший хизмат касб-ҳунар коллежи бошланғич ташкилот етакчиси Жуманова Дилбар томонидан туман марказида аҳоли ва ёшларнинг маданий дам олишлари учун “Маданият ва истироҳат боғи” барпо этилиши ҳамда фаолиятини йўлга қўйиш тўғрисидаги таклифи қўллаб-қувватланди.

Бахмал хизмат кўрсатиш касб-ҳунар коллежи битирувчиси Мухторов Ҳусниддиннинг “Қоғоз қоп ва ёғоч яшик ясаш ишлаб чиқариш” бизнес режаси учун Халқ банки Бахмал филиалидан 15 млн. сўм кредит маблағи ажратиш тўғрисидаги ва шу каби 10 дан ортиқ таклифлар ижроси юзасидан тегишли масъул раҳбарларга кўрсатмалар берилди.

Учрашув якунида ушбу муаммолар ва таклифлар юзасидан тегишли масъулларга топшириқлар берилди.