Германиянинг Audi автомобилсозлик компанияси янги авлод A8 седанининг навбатдаги тизерини намойиш этди. Суратда моделнинг узун намунаси акс этган. Бунда, унинг ёритқич чироқларининг айрим жиҳатлари эътиборни тортади. Шунга кўра, айтиш мумкинки, янги машина ҳозирда ишлаб чиқарилаётган «Ауди»ларнинг ҳеч бирига ўхшамайди. 

Хусусан, 4 эшикли автомобиль оригинал дизайнли диод чироқларга эга бўлади. У битта ётиқ ва учта тик диодлар тўпламидан иборат бўлади. Бундан ташқари, суратда орқа чироқлар қандай кўринишга эга бўлиши ҳақида тасаввур ҳосил қилиш мумкин. 

Янги Audi A8 тизери

A8 тақдимоти 11 июль куни бўлиб ўтади. Аввалги тизерларда седаннинг айрим қизиқарли жиҳатларига эътибор қаратилган эди. Оёқларни уқалаш ва мустақил автотураргоҳга жойлашиш тизими шулар жумласидан, деб ёзади motor1.com сайти.

Янги Audi A8 тизеридаги орқа чироқлар кўриниши

Audi компанияси, янги автомобиль учун автопилот ҳақида ҳам сўз юритган. Седан мустақил равишда тезлашади, секинлашиб тўхтайди ҳамда соатига 60 км тезликда манёвр қила олади. Бунда қўлни доимий равишда рулда ушлаб туриш талаб этилмайди. 

Модель янги подвеска, турли моторлар тўплами ва mild hybrid (MHEV) гибрид тизими билан жиҳозланади.