«Сувсоз» корхонаси томонидан Тошкент шаҳрида 21 июлдан совуқ сув таъминоти хизмати учун янгиланган тарифлар жорий этилади. Тошкент шаҳри ҳокимияти 4 июль куни янги нархларни тасдиқлаган. Тарифларнинг қимматлашуви электр энергия ва бошқа ресурслар нархининг қимматлашуви билан боғлиқ.

Аҳоли учун бир куб метр совуқ сув нархи 180 сўмдан 190 сўмга, канализация хизматлари 115 сўмдан 155 сўмга қимматлашади.

Ҳисоблагич бўйича тўлов амалга оширишда марказлашган иссиқ сув таъминотига эга кўп қаватли уйларда (иссиқ сувга ҳисоблагич бўлмаганда) 1 метр куб нархи 500 сўм (ҳозирда — 410 сўм), марказлашган иссиқ сув таъминотисиз — 345 сўм (ҳозирда — 295 сўм).

Хусусий сектор уйларида канализация мавжуд бўлганда бир куб метр сув нархи 295 сўмдан 345 сўмга, канализациясиз — 180 сўмдан 190 сўмга оширилади.

Маълумот учун, ҳисоблаш ускуналари бўлмаган ҳолатларда совуқ сув хизмати бўйича тўловлар белгиланган тарифларга ошиб борувчи 1,5 коэффициентни татбиқ этиш билан амалга оширилади.

Совуқ сув нархлари реестри

Бунгача охирги марта ўтган йилнинг 1 октябрида совуқ сув тарифи 8 фоиз ошганди.

Эслатиб ўтамиз, 15 июлдан Ўзбекистонда электр энергияси ва газ тарифлари ҳам ошади.

Тошкент шаҳрида 15 июлдан иссиқ сув таъминоти ва иситиш тизими хизмати тарифлари ҳам қимматлашади.