Бир қатор араб давлатлари томондан Қатарга 13 та талабдан иборат рўйхатнинг тақдим қилиниши "Қатар давлатчилигига нуқта қўяди". Бу ҳақда 6 июлда Туркия президенти Ражаб Тоййиб Эрдўған айтиб ўтди.

Унинг фикрича, "бу каби таклифларнинг қабул қилиниши имконсиздир".

Эрдўған Туркия бундан буёғига ҳам Қатар билан келишувларга амал қилишини таъкидлаб ўтди. "Анқара Доҳа билан тузилган келишувларни ҳурмат қилади ва келишув шартларига амал қилади. Қатар ҳукумати амирликдан турк ҳарбий базасини чиқариш ташаббуси билан чиқмагунча, бундай ташаббус муҳокама қилинмайди. Биз бундай қадамга бормаймиз", деб айтган Эрдўған.   

Бир ой аввал Саудия Арабистони, БАА, Баҳрайн ва Миср Қатар билан дипломатик алоқаларни узганди. Кейинроқ бу 4 та давлат юзага келган инқироздан чиқиш учун 13 талабни белгилаб, бу талаблар рўйхатини Кувайт орқали Қатарга берганлар. Қатарга талабларни бажаришга 10 кун берилган. Бироқ Қатар талабларни бажаришдан бош тортган. Шу сабабли 4 араб давлати Қатарга у сиёсатини ўзгартирмагунча сиёсий ва иқтисодий босим ўтказишни давом эттиришга қарор қилган.