Бугун, 7 июль - жума куни Россия ва АҚШ экспертлари Иордания пойтахтида Сурия жануби-ғарбида деэскалация зонасини яратиш бўйича келишувни тузиб чиқишни якунлашган. Унга кўра, Дамашқ вақти билан 9 июль кунидан ўт очишни тўхтатиш бўйича сулҳ кучга киради. Бу ҳақда Россия ТИВ раҳбари Сергей Лавров маълум қилди.

"Бугун Иордания пойтахти Омман шаҳрида Россия, АҚШ ва Иордания экспертлари иштирокида учрашув бўлиб ўтди, улар Сурия жануби-ғарбидаги Дераа, Кунейтра ва Сувейда ҳудудларида деэскалация зонаси тузиш бўйича меморандумга келишишди. Дамашқ вақти билан 9 июль куни соат 12:00дан ушбу келишув амалда бўлади", - дея маълумот берган Сергей Лавров Россия ва АҚШ президентлари Владимир Путин ҳамда Доналд Трамп учрашувидан кейин.

"АҚШ ва Россия ўт очиш сулҳига амал қилинишини таъминлашни зиммасига олади. Шунингдек, Иордания пойтахтидан ҳудудларга гуманитар ёрдамлар етказиб берилиши назоратга олинади", - дея қўшимча қилган у.

Бундан аввалроқ Assosiated Press агентлиги Вашингтон ва Москва Сурия масаласидаги сулҳ ҳақида эълон қилиниши кутилаётгани тўғрисида хабар берганди.

Лавров Суриядаги хавфсиз ҳудуд хавфсизлиги Россия ҳарбий полицияси томонидан таъминланишини қўшимча қилган.

Асад кетиши шарт эмас — АҚШ Сурия бўйича янги режа тайёрлади