Россия Президенти Владимир Путин АҚШ президенти Доналд Трамп билан учрашуви вақтида ушбу ҳамкасби билан шахсан танишиш имконига эга бўлганидан хурсандлигини билдирди. У шу вақтгача ўтказилган телефон мулоқотлари етарли бўлмаганини қайд этди.

«Жаноб президент, сиз билан шу вақтгача бир неча марта телефон орқали мулоқот қилгандик. Албатта, телефон мулоқотлари етарли эмасди. Агар биз икки томон кун тартибидаги долзарб масалаларни ҳал қилишни, халқаро доирадаги янада муҳим масалаларга ечим топишни истар эканмиз, учрашишимиз зарур эди», — дея россияликлар етакчисининг сўзларини келтирган C-SPAN.

Путин Трамп билан «шахсан танишганидан» жуда хурсанд экани, бугунги учрашув эса албатта натижалар келтириши ҳақида қўшимча қилган.

Путин ва Трампнинг учрашуви G20 саммити доирасида ўтказилди. Бу икки сиёсатчининг илк учрашувидир. Бунгача сиёсатчилар бир неча марта телефон орқали боғланишганди.

Уларнинг илк учрашувида АҚШ Давлат департаменти раҳбари Рекс Тиллерсон ва Россия ТИВ раҳбари Сергей Лавров ҳам иштирок этди.