Ҳозирда Ўзбекистонда жазирама ёз ҳукмронлик қилмоқда.

Бундай об-ҳавода Андижон вилояти ҳудудида фаолият юритаётган 
217 та “Автомобилларга ёқилғи қуйиш”, 45 та “Автомобилларга суюлтирилган пропан газ тўлдириш” ва 51 та “Автомобилларга метан газ тўлдириш компрессор” шохобчаси ва 6 та нефть маҳсулотларини сақлаш омборидаги ходим ва мутасаддилардан ёнғин хавфсизлигини таъминлаш, содир бўлиши мумкин бўлган кўнгилсиз ҳодиса ва ёнғинларнинг олдини олиш бўйича янада маъсулиятли иш олиб бориш талаб қилинади.

Андижон вилоят Ички ишлар бошқармаси, Ёнғин хавфсизлиги бошқармаси ходимлари томонидан ҳар бир шохобчага бориб, маскандаги ишчи хизматчилар билан профилактик тушунтириш ишлари олиб борилиб, керакли тавсиялар бериб келинмоқда. Ёнғин хавфсизлиги ходимлари билан кўргазмали тарзда ўқув-йиғин машғулотлари ташкил қилинди.

Жазирама об-ҳаво ҳамда кундалик иш фаолияти давомида шохобча раҳбари ва ишчи ходимларидан қуйидаги қоидаларга амал қилиши лозим:

- шохобчага кириб келаётган транспорт воситаларидаги йўловчи ва фуқароларнинг мавжуд эмаслигига;

- шохобча ҳудудига кирган транспорт воситалари ҳайдовчиларидан махсус гувоҳномалар мавжудлигига;

- автомобилларга метал газ баллонлари ўрнатилган бўлиши, баллонлар белгиланган муддатларда синовдан ўтказилганлигига;

- мутахассисликлари бўйича ўқув курсларини тамомлаган фуқароларни ишга қабул қилиниши ва ишчи-хизматчиларнинг техника ва ёнғин хавфсизлиги бўйича доимий йўриқномадан ўтказилиб борилишига;

- шохобча ишчи-хизматчиларнинг махсус кийим-бош билан таъминланганлигига;

- автомобилларга ўрнатилган газ баллонларнинг синов муддати ўтмаганлигига;

- шохобчаларни бирламчи ёнғин ўчириш воситалари билан тўлиқ жиҳозланганлигига;

- шохобчалар ҳудудида ёнғинга қарши сув ҳовузларининг мавжудлиги ва сув билан тўлдирилганлигига ҳамда ёнғин ўчириш техникаси (мотопомпа) созлигига;

- шохобчалар ҳудудида ёнғин ва техника хавфсизлиги бўйича огоҳлантирувчи эслатма, плакат ва белгилар мавжудлигига;

- масканларда ёнғин ёки бошқа фавқулодда ҳодисалар содир бўлганда инсонларни ва моддий бойликларни қутқариш режаси ишлаб чиқилиб, кўринарли жойларга осиб қўйилганлигига алохида эътибор қаратилишини сўраб қоламиз.

Ушбу меъёр қоидаларига амал қилишлик ўзимиз ва яқинларимиз ҳаётини, жамият ва шахсий мулкимизни турли кўнгилсизликлардан асраган бўламиз ва бунга барчамиз бирдек масъулмиз. 

Андижон вилояти ИИБ ЁХБ катта мухандиси: Улуғбек Қосимов