G20 давлатлари шу йилнинг сентябридан бошлаб солиққа оид маълумотларни автоматик тарзда алмашиша бошлашади, дейилади Германия раислигида Ҳамбургда ўтган «йигирмалик» саммити коммюникесида.

«2017 йил сентябрида OECD (Organisation for Economic Co-operation and Development — Иқтисодий ҳамкорлик ва тараққиёт ташкилоти) ягона ҳисобот стандартлари асосида молиявий ҳисоблар ҳақида дастлабки автоматик маълумот алмашишни кутмоқдамиз», — дейилади ҳужжатда. G20 давлатлари етакчилари солиқ базасининг емирилиши ва фойдани солиққа тортишдан олиб қочишга қарши курашиш режаси (BEPS)га содиқлигини тасдиқлашди ва барча юрисдикцияларни бунга қўшилишга чақиришди.

Айни пайтда BEPS режасига 100 дан ортиқ давлат, жумладан, Россия аъзо бўлган. Бироқ Россия Федерацияси солиқ органлари солиқ тўловчиларнинг активлари ҳақидаги маълумот алмашувга 2018 йилдан қўшиладиган бўлди.

Саммит иштирокчилари ривожланаётган давлатларнинг солиқ салоҳиятини ўстиришда уларга мадад беришда давом этишларини билдиришди.

«Биз солиқ соҳасидаги аниқликни ошириш ва OECD иштирокида иқтисодиётни рақамлаштиришдаги солиққа оид таҳдидлар борасида ишламоқдамиз. Коррупция, солиқлардан қочиш, террорчиликни молиялаштириш ва пул ювишга қарши курашишнинг муҳим элементи сифатида биз миллий ва трансчегаравий даражаларда юридик шахслар мулкларининг бенефициар шаффофлиги соҳасида халқаро стандартларнинг самарали жорий этилишида ёрдам берамиз», — дейилади ҳужжатда.