ФОТО: Хитойнинг Гуланюй оролидаги объектлар

Польшанинг Краков шаҳрида 41-сессиясини ўтказган ЮНЕСКОнинг Бутунжаҳон мероси қўмитаси Осиё қитъасидаги уч объектни Бутунжаҳон мероси рўйхатига қўшган. Бу ҳақда ташкилотнинг Twitter’даги саҳифасида маълум қилинган.

Энди бу рўйхатдан Ҳиндистон ғарбидаги Аҳмадобод шаҳрининг эски шаҳар қисми ўрин олди. У эски ички кўчалар атрофидаги барпо этилган ва дарвозалари қулфланувчи маҳаллалар лабиринтлари билан эътибор қозонган. Ҳар бир маҳалла алоҳида қалъадан иборат. Ҳиндистонда бундай объектлар сони энди 36 тага етди.

Хитойда Бутунжаҳон рўйхатига мустамлакачилик маданияти архитектура ёдгорликларидан иборат Гуланюй ороли ҳам киритилди. Жанубий Хитой денгизида жойлашган бу оролга XIX асрда европалик савдогарлар келиб жойлаша бошлашади ва улар ўзларига хос уйлар, қасрлар, черковлар, шифохоналар ва дўконлар қура бошлашади. Ҳозирда бу туристлар орасида жуда машҳур даргоҳ бўлиб, у ерда ҳатто автомобиллар қатнови тақиқланган. Объект Хитойдаги 51-чиси бўлди.

ЮНЕСКО қўмитасининг яна бир қарори Камбожадаги Самбор Прей Кук ибодатхонасининг киритилиши билан якун топди. Бу мажмуада VI асрдан бери мавжуд бир неча ўнлаб ибодатхоналар ўрин олган. 1970-йиллар бошида итбодатхоналарнинг аксарияти бомба ёғдирилиши туфайли шакастланган, айрим ҳудудлар ҳанузгача вайроналигича қолмоқда.

Краковдаги ЮНЕСКО Бутунжаҳон мероси қўмитаси сессиясида Бутунжаҳон мероси рўйхатига қўшилиш учун 30 дан ортиқ янги тавсияномалар муҳокама этилмоқда. Янги номзодларни кўриб чиқиш бугун ҳам давом эттирилади. Сессия ўз ишини 12 июль куни якунлайди.

Эслатиб ўтамиз, Ўзбекистонда 6 та объект ЮНЕСКО Бутунжаҳон мероси рўйхатидан ўрин олган. Улар: Хивадаги Ичан қалъа, Бухоро шаҳрининг тарихий маркази, Шаҳрисабз шаҳрининг тарихий маркази, Самарқанд — маданиятлар чорраҳаси, Чотқол қўриқхонасидир. Улардан ташқари яна 30 та объект дастлабки рўйхатга номзод сифатида киритилган.