9 июлга ўтар кечаси россиялик таниқли блогер Антон Носик оламдан ўтган. Бу ҳақда «Варламов.ру» ўз манбаларига асосланиб хабар тарқатди.

Дастлабки хабарларга кўра, унинг вафотига юрак хуружи сабаб бўлган. 

Носик рус тилидаги интернет олами асосчиларидан бири эди.

4 июль куни ушбу «Рунет отаси» дея тарифланадиган журналист, жамоат арбоби 51 ёшини нишонлаганди.

Антон Носик турли йилларда Vesti.ru, Lenta.ru, Gazeta.ru ва NEWSru.com нашрларида муҳаррир бўлган.

2015 йил охирида Антон Носикка нисбатан Россиянинг Сурияга кириши ҳақидаги мақоласи туфайли Россия Жиноят кодексининг «Нафрат ва адоват қўзғатиш» моддаси бўйича айблов қўйилганди.

Носикнинг «Живой журнал»даги мақоласи бўйича жиноий иш 2015 йил ноябрда қўзғатилган. Блогернинг 1 ноябрдаги пости терговчиларнинг эътиборини тортган. Унда блогер Россия авиацион гуруҳининг Суриядаги авиазарбаларини «қизғин маъқуллаган».

Ўтган йил ноябрда Носик нима экстремизм ҳисобланиши ёки ҳисобланмаслигига изоҳ беришга тайёрмаслигини айтган. У экстремизм ҳақидаги қонун мавжуд бўлгандан бери унда «экстремизмнинг ҳуқуқий жиҳатдан аниқ таърифини кўрмаганини» айтган. Носик ўз постини ўчирмоқчи эмаслиги, ўз сўзларини экстремистик деб ҳисобламаслиги ва уларда қандайдир ҳаракатларга чорлов кўрмаётганини таъкидлаб ўтганди.