Қирғизистонлик фуқаролик жамияти фаоли Анвар Сартаев Қирғизистон Марказий сайлов комиссиясига президентликка номзодлик сифатида рўйхатга олишини сўраб ариза топширди. 

Анвар Сартаев - Қирғизистон республикаси қуролли кучлари фахрийси, истеъфодаги полковник. У мамлакатда фахрийларнинг манфаатлари ҳимоячиси сифатида танилган. 

Эндиликда Қирғизистон президентлиги учун номзодлар сони 19 нафарга етди. Шундан 16киши мустақил номзодлар бўлиб, қолган 3 номзод партиялар қурултойларида илгари сурилган. 

Президентликка номзодларни рўйхатга олиш август ойида бошланади. Даъвогарлар бунгача 30 минг сайловчининг имзосини тўплаши талаб этилади. Бундан ташқари, қирғиз тилини билиши бўйича имтиҳон топширади ҳамда 1 млн сом (15 минг АҚШ долларига яқин) миқдорида гаров пули киритади. Мамлакатнинг ҳозирги президенти Алмазбек Атамбоев иккинчи муддатга сайлана олмайди. Чунки, сайлов қонунчилигига мувофиқ, фуқаро бир марта 6 йиллик президентликдан сўнг, иккинчи муддатга сайлана олмайди.