2013 йилда Россия президенти Владимир Путинга суиқасд қилишга тайёргарлик кўрганлик учун озодликдан маҳрум этилган Қозоғистон фуқароси Илья Пьянзин афв этиш борасида мурожаат билан чиқди. Бу ҳақда «Коммерсантъ» газетаси ёзмоқда.

«Жиноят сизга қарши йўналтирилганди, шунинг учун сизга шахсан мурожаат қилишга қарор қилдим», - дейилади Пьянзиннинг мурожаатида.

Пьянзиннинг рафиқаси ҳам мурожаат Самара вилоятидаги 26-сонли қаттиқ тартибли колония маъмуриятига май ойида юборилганини маълум қилди.

Қозоғистон фуқаросининг сўзларига кўра, у фитна иштирокчисига тасодифан айланган. Бундан ташқари, газетанинг ёзишича, ундан фойдаланишган, “у аслида нима қилишмоқчи эканини тушунганда эса, ортга чекиниш учун вақт қолмаганди”.

“Мен қўрқиб кетдим. Гарчи қўрқув менинг бу аҳмоқона жиноятда иштирок этганимни оқлай олмаслигини ҳам тушунганман», - дея маълум қилди Пьянзин.

РИА Новости’нинг хабар беришича, 2012 йилда Одесса шаҳрида экстремистик гуруҳ фаолияти фош этилган. Унга чеченистонлик Адам Осмаев ва Руслан Мадаев ҳамда Қозоғистон фуқароси Илья Пьянзинлар аъзо бўлган. Одессадаги уларнинг базаси ҳисобланган хонадонлардан бирида қўлбола бомба ишлаб кетган. Ўшанда Мадаев ҳалок бўлди, қўлга олинган Пьянзин эса Украина хавфсизлик хизмати ходимларига шериклари портловчи қурилмани Владимир Путинга суиқасд учун тайёрлашганини айтиб ўтган.