Холмурод Холиқов (исм-фамилиялар ўзгартирилган) Қарши муҳандислик-иқтисодиёт институти талабаси бўлишни ният қилди. Таниши, шу институтнинг 1-босқич талабаси Комилжон Жўраев бир куни унга антиқа таклиф айтиб қолди, деб ёзади “Ҳуқуқ” газетаси.

Нима эмиш, уч минг “кўк”идан берса, зўр жойларда ишлайдиган танишлари орқали институтнинг кимё-технология факультетига бюджет асосида ўқишга киритиб қўяр эмиш.

Абитуриент ва “ҳожатбарор” талаба Қарши шаҳридаги савдо дўконларидан бирининг ёнида учрашишди. Холмурод келишилган пулнинг ярмини олиб келганини айтди. Комилжон пулни олган вақтда ҳуқуқни муҳофаза қилувчи орган вакиллари томонидан қўлга олинди.

Талаба тадбир давомида ўз қилмишидан пушаймон бўлиб, пулни таниши О.Йўлчиевга бериши кераклигини, у Холмуродни 3000 АҚШ доллари эвазига ўқишга киритишга ваъда берганини айтди.

Х.Холиқовнинг аризаси билан бошланган тезкор тадбир яна давом эттирилди. О.Йўлчиев хизмат машинасида К.Жўраевдан 1500 АҚШ долларини олган вақтда ушланди.

Суд ҳукми билан икки “ҳожатбарор” қилмишларига яраша жазога тортилди.