Қирғизистон президенти Алмазбек Атамбоев АҚШнинг йирик корпорациялари вакиллари билан учрашувда мамлакатни бизнес учун “жаннат” деб атади. Бу ҳақда РИА “Новости” хабар бермоқда.

Таъкидланишича, Бишкекда Қирғизистон-АҚШ биринчи бизнес-форуми бўлиб ўтмоқда, унда Американинг йирик компаниялари вакиллари иштирок этмоқда.

“Қирғизистон бизнес учун “жаннат”га, ҳалол ва шаффоф ишлаб, сармоя киритиш ҳамда катта маблағларни ишлаб топиш мумкин бўлган эркин давлатга айланиб бормоқда”, - деган Атамбоев.

Қирғизистон президенти Американинг йирик бизнеси вакиллари билан тўғридан-тўғри алоқаларни йўлга қўйиш муҳимлигини таъкидлаб ўтди. Унинг қўшимча қилишича, Америка ишбилармон доира вакилларининг келиши ривожланган давлатлар бизнесининг Бишкек билан ҳамкорликка қизиқиши ортиб бораётганидан далолат беради.