Мексика суди жиноятчилардан қочиб кетган олти нафар полициячини 27 йиллик қамоқ жазосига маҳкум этди. Бу ҳақда Excelsior хабар берди.

2016 йилда маҳаллий фуқаролардан бирининг қўнғироғи билан полициячилар Синалоа штатидаги Кристо-Рэй шаҳрига етиб келишган. Воқеа жойида эркакни ўғирлаш ҳаракатида бўлган жиноятчиларга тўла бир неча юк машиналарини кўргач, полициячилар қочиб қолишни маъқул топишди.

27 ёшли эркакнинг ўғирланиши, шунингдек полициячиларнинг қочиши тасвирланган кадрлар ижтимоий тармоқларда тарқаб кетди. Бундан ташқари, видеоролик суд учун ўзига хос далилга айланди.

Юқори мансабли полиция амалдорлари қўл остидаги ходимларининг қочиши алоҳида стратегия бўлганини тушунтиришга ҳаракат қилганлар, бироқ суд бу фикрга қўшилгани йўқ.