Кўргазмага ташриф буюрган аёл селфи қилмоқчи бўлиб, 200 минг долларлик қийматга эга экспонатларга зарар етказди, деб хабар бермоқда Mashable.

Ҳодиса бир неча ҳафта аввал рўй берган, бироқ хорижий ОАВ бу ҳақда эндигина маълумот берди.

Номи ошкор этилмаётган аёл Лос-Анжелесдаги 14th Factory экспозициясига ташрифи чоғида, автопортрет қилишга қарор қилган. У махсус асосларда ўрнатилган экспонатлар ва бошқа ҳайкалтарошлик намуналари ёнига ўтирган.

Видеокузатув камераларидаги ёзувга кўра, аёл мувозанатни йўқотган ва ўзига энг яқин бўлган экспонатни туртиб юборган. Бу ўзига хос домино эффектини юзага келтирди, натижада камида 10 та арт-объектли постаментлар тушиб кетди.

Музей ходимларининг маълум қилишича, учта иш ҳодиса туфайли “тиклаб бўлмайдиган ҳолатга келган”.