Япония авиакомпаниялари 18 июлдан эътиборан АҚШ сўрови билан йўловчиларни самолёт бортига киритишдан аввал уларни жиддийроқ текширувдан ўтказишни бошлайди. Бу чоралар самолёт бортига қўл юкида олиб ўтилаётган электроника жиҳозлар: ноутбук, планшет, электрон китоб ва фотоаппаратларга тегишлидир, деб хабар қилмоқда ТАСС агентлиги. 

Айни вақтда, ушбу чоралар барча йўловчиларга жорий этиладими ёки фақат АҚШга парвоз қиладиган йўловчиларга тегишлими, деган савол очиқ қолаяпти. Бироқ, дастлабки маълумотларга кўра, Япониянинг АҚШга тўғридан-тўғри парвозни амалга оширувчи 7 та аэропортида кучайтирилган текширувлар йўлга қўйилади. Булар Токионинг Нарита ва Ханэда ҳаво гаванлари, Кансай, Син-Титосэ, Сендай, Тюбу ва Фукуока аэропортларидир.

Март ойи охирида Америка ҳукумати Миср, Иордания, Қатар, Кувайт, БАА, Саудия Арабистони ва Туркиянинг 10та йирик аэропортидан АҚШга учадиган йўловчиларни текшириш талабларини кучайтирди. Улар самолётлар бортига мобил телефондан катта бўлган электрон қурилмаларни олиб ўтишлари тақиқланди. 

Вашингтон ушбу мамлакатлардан учаётган йўловчилар самолёт бортига компьютер кўринишидаги портловчи қурилмаларни олиб ўтиш эҳтимолидан хавфсирамоқда. Авиакомпания бу талабларни бажармаса, унинг Америка парвозни амалга ошириш лицензияси бекор қилинади.