Аввал хабар берилганидек, Ўзбекистон Республикаси Олий Мажлиси Қонунчилик палатасида парламент палаталари, сиёсий партиялар, Ўзбекистон Экологик ҳаракати, халқ депутатлари вилоят, туман ва шаҳар кенгашлари фаолиятининг таҳлили ҳамда истиқболдаги вазифаларига бағишланган видеоселектор йиғилиши бўлиб ўтди. 

Йиғилишда Ўзбекистон Республикаси Президенти Шавкат Мирзиёев маъруза қилди. Унинг маълум қилишича, Олий Мажлис таркибида муҳим тузилма, яъни, Илмий-амалий тадқиқот ва ахборот-таҳлилий фаолият олиб борадиган, қонун лойиҳаларини ишлаб чиқадиган Марказнинг йўқлиги бу борадаги ишларнинг юқори савияда ташкил этиш имкониятини бермаяпти.

“Илғор хорижий тажрибадан келиб чиққан ҳолда, Олий Мажлис ҳузурида қонунчилик муаммоларини ўрганиш Институтини ташкил этишни таклиф қиламан. Бу Институт парламент аъзоларининг буюртмасига асосан, ҳуқуқни қўллаш амалиёти ва хорижий тажриба бўйича таҳлилий маълумотлар ва қонун лойиҳаларини тайёрлаш ишлари билан шуғулланиши лозим. Бу нима учун керак? Бу институт депутат ва сенаторларнинг энг яқин ёрдамчиси вазифасини бажариши керак”, - деди Президент.

Шунингдек, давлат раҳбарининг айтишича, Давлат бошқарув академияси билан биргаликда депутатлар малакасини ошириш бўйича ўқув курсларини ташкил этиш ҳам фойдадан холи эмас. 

“Биз туман депутатларини ўқитмоқчимиз, лекин мана Тошкентда турибди. Сизларни ҳам яхшилаб ўқитсак, депутатликдан кейин ҳам фаолиятга керак ўқиш барибир”, - деди Мирзиёев.