Financial Times нашрининг хабар беришича, Дисней мультфильми қаҳрамони Винни Пух Хитойда тақиққа учради – ўтган дам олиш кунлари ижтимоий тармоқлардан айиқча тасвирланган барча суратлар ҳамда гифлар олиб ташланган. Бунга сабаб –  Винни Пухнинг Хитой раҳбари Си Цзиньпин билан ташқи ўхшашлиги экан.

Бу борада расмий тушунтиришлар берилмади, бироқ, Financial Times’нинг тахминича, бу қадам – Хитой Коммунистик партиясининг кузги қурултойидан аввал цензуранинг кучайтирилиши билан боғлиқ. Қурултой давомида раҳбариятда қатор муҳим ўзгаришлар юз бериши кутилмоқда.

Экспертлардан бирининг газетага хабар беришича, ижтимоий тармоқларда Си Цзиньпинни танқид қилган фойдаланувчилар ҳибсга олингани билан боғлиқ ҳолатлар ҳам мавжуд. "Винни Пух – умумий тренднинг бир қисми холос", - дея қўшимча қилиб ўтган у.

Ҳозирда Weibo ижтимоий тармоғида хитойчада "Винни Пух" сўзларини ёзганда, "ноқонуний контент" деган огоҳлантириш чиқиб келаётгани айтилмоқда, бироқ, баъзи фойдаланувчилар бу тақиқни четлаб ўтишнинг уддасидан чиқишган.