Тошкент шаҳридаги Инҳа университети (IUT)нинг уч нафар битирувчилари Жанубий Кореядаги Инҳа университетининг магистратурасида таълим олиш имкониятини қўлга киритишади, деб хабар бермоқда университет сайти.

Тошкент шаҳридаги Инҳа университети ректори Сарвар Бабахўжаев Жанубий Кореядаги Инҳа университети раҳбарияти билан музокаралари давомида IUT битирувчилари учун Корея Республикасидаги Инҳа университетида таълим олиш имкониятини яратиш тўғрисида келишиб олди.

Келишувга мувофиқ, 2019-2020 академик йилдан бошлаб, IUT’ни бакалавриат дастури бўйича тамомлаган уч нафар талабалар Жанубий Кореядаги Инҳа университетининг магистратурасида таълим олиш имкониятини қўлга киритишади. 

Қайд этиш керак, Жанубий Кореядаги магистратурада таълим олиш учун талабаларга Тошкент шаҳридаги Инҳа университети маъмурияти тавсиянома беради. Талабалар магистрлик даражасини олиб қайтишгач, IUT’га ишга қабул қилинадилар.

Ҳозирда “Компьютер ва дастурий инжиниринг” факультетининг 4-босқич 99 нафар талабалари Жанубий Кореядаги Инҳа университетида таҳсил олишмоқда. Улар Жанубий Кореяда икки семестр давомида – 2017 йилнинг декабрь ойига қадар таълим олишади.