Сурхондарёдаги мудҳиш қотиллик тафсилоти

Жамият 17 Июль 2017 60763

Ҳусан Ҳакимов (исм-фамилиялар ўзгартирилган) ўттиз ёшдан ошибдики, на бир тайинли ишнинг бошини тутди, на уйланиб, бир оилага бош бўлди. Бетайин юришлари, ноқонуний қадам олиши сабаб муқаддам судланиб, 6 йил муддатга озодликдан маҳрум қилинади. Ҳукумат томонидан унга бағрикенглик кўрсатилиб, 2015 йилнинг ноябрь ойида озодликка чиқади, деб ёзади “Ҳуқуқ” газетаси.

Қилмиши учун сабоқ олгулик жазони ўтаб чиққанидан сўнг ота-онаси, қариндош-уруғлари унинг инсофга келишидан умидвор бўлишди. Аммо Ҳусан уларнинг умидларини пучга чиқарди. Орадан ярим йилча вақт ўтиб, мудҳиш жиноятга қўл урди.

2016 йил апрель ойининг сўнгги кунларидан бири. Ҳусан кечки соат еттиларда ўртоғи Шоқосим билан маҳалласи ҳудудидаги дўконга кириб, “ширингина” бўлиб қайтиб чиқди. Қадрдонлар дарров хайрлашмасдан, ташқарида суҳбатни давом эттиришди. Ш.Муродов кетгач, Ҳусан дўконга қайтиб бориб, яна бир шиша ароқ сотиб олди. Уйига қайтаркан, қандайдир қўшиқларни хиргойи қилиб, йўл-йўлакай спиртли ичимлик истеъмол қилиб борди. Бир маҳал ёнидан тугун кўтарганича шошиб кетаётган аёл ўтди-ю, унинг фикри бузилди.

Аёлнинг ёлғизлигига ишонч ҳосил қилгач, миясида чақнаган бузуқ ниятини амалга ошириш ҳаракатига тушиб қолди. Унинг ортидан тушиб, йўлнинг бир томони дала билан туташган қисмига етганида “ҳужум”га ўтди. Ҳе йўқ, бе йўқ аёлга ташланиб, уни дала томонга тортди. Жабрланувчи бақир-чақир қилиб, унга қаршилик кўрсатди. Ҳ.Ҳакимов унинг бошига шиша билан урди. Зарбдан чўк тушиб қолган аёл яна-да баландроқ овозда қичқириб, ёрдамга чақираверди. Хавотир ва саросимага тушиб қолган Ҳусан бутунлай идрокини йўқотди. Хаёлини “тинчитиш керак” деган мудҳиш фикр банд қилиб, қўллари шу буйруққа бўйсунди. Ердан тош олиб, ожизанинг ҳаётига “нуқта” қўйди.

Қилғиликни қилиб бўлгач, мурдани кўздан пана қилиш борасида бош қотира бошлади. Аёлнинг жасадини шундоққина йўл ёқасидаги ғалла майдонига олиб кириб, ариқ ичига ташлади. Бир инсоннинг умрига зомин бўлгани етмаганидек, марҳуманинг қўлидан умумий қиймати 1 млн. сўмликдан ошиқроқ бўлган узугини ва бир жуфт зирагини ечиб олди. Аввалига уни шу ерга ташлаб кетмоқчи бўлди. Бироқ фикридан қайтиб, марҳуманинг танасини дала бўйлаб судраганича ўзининг яшаш уйи томорқаси этагига олиб келди. Уйидан кетмон олиб чиқиб, жасадни кўмиб ташлади.

Бу кимса худди кеча тунда ҳеч нарса бўлмаганидек, эртаси кундан одатдаги ҳаётини давом эттирди. Орадан икки ҳафтача ўтиб, ўзи қазиган қабрдан хабар олди. Қараса, қабр итлар томонидан кавланиб, жасад ер юзасига чиқиб қолибди. Қилмиши ошкор бўлишидан юраги орқага тортиб кетган Ҳ.Ҳакимов мурдани қазиб олиб, 2 та полиэтилен қопларга жойлади. Чўкиши қулайроқ бўлиши учун тошлардан ҳам солиб, қопларни томорқасининг орқа томонидан оқиб ўтувчи дарёга ташлаб юборди.

Жасадни дарёга оқизган Ҳусан барибир хотиржам бўла олмади. Қандайдир куч уни таъқиб қиларди. Энди у ҳар дақиқада қилмиши ошкор бўлиб қолишидан хавотирга туша бошлади. Шу сабабли ишлаш баҳонасида пойтахтга йўл олди. Тошкент шаҳрига келиб, одамларнинг кунлик ишларини қилиб, пул топиб юрди. Орада уйига ҳам бориб-келиб турди. Шу тахлит ёзни ўтказди. Куз бошида эса эски “саргузашт”ни бошлади. Ижтимоий тармоқ орқали Юнусобод туманида яшовчи Дурдона исмли аёл билан танишиб қолади. Уларнинг бундай танишуви бора-бора жиддийлашиб, яқин муносабатга айланди. Бир неча маротаба учрашишди. Ҳ.Ҳакимов тез орада аёлнинг кўнглига йўл топиб, сирларидан воқиф бўлди ва товламачилик йўлига ўтди. Унга осмондаги ойни-да олиб беришга тайёр бўлиб турган Ҳусан хушторидан 700 минг сўм пул талаб қилди. Унинг бу иши Д.Холматовани карахт қилиб қўйди. Бироқ, бу ҳали ҳаммаси эмасди. Ҳ.Ҳакимов очиқдан-очиқ “шантаж” йўлига ўтиб, агар пул бермаса, ўрталаридаги яқин муносабатни унинг турмуш ўртоғига ошкор қилиш билан қўрқитади. Иложсиз қолган Дурдона унга 400 минг сўм пул, 200 минг сўмлик “Самсунг” русумли уяли алоқа телефон аппарати ва 2 дона қиймати 1 млн. 300 минг сўмлик узукларини беришга мажбур бўлади.

Д.Холматова шу билан “қутулдим”, деб ўйлаганди. Бироқ Ҳусан деганлари осонгина “таслим бўладиган”лар хилидан эмас экан. Аёлдан ундирганларини харж қилиб бўлиб, яна Дурдонани “йўқлаб” қолди. Телефон орқали учрашувга чақириб, кўнгилни хушлаш ниятида эканлигини айтди. Аммо Дурдона товламачи билан ортиқ учрашиш нияти йўқлигини маълум қилиб, унга рад жавобини берди. Бу жавоб Ҳ.Ҳакимовга ёқмади. Энди зўравонлик йўлига ўтиб, аёлни уриб-тепиб, унга қасддан шикаст етказади.

Жиноят ортидан жиноятга қўл урган йигит барча қилмишлари учун жавоб бериши тайинлигига суднинг қора курсисига ўтирганида яна бир карра амин бўлди. Жиноят ишлари бўйича Сурхондарё вилоят суди томонидан Ҳ.Ҳакимовга узоқ муддатга озодликдан маҳрум қилиш жазоси тайинланди.

Кун янгиликлари
“Tashkent study”да имтиҳондан муваффақиятли ўтиш сирларини ўрганинг
10:36 1099 Жамият
Оққон билан оғриган 5 ёшли бола тезкор ёрдамга муҳтож
17:52 / 24.07.2017 14324 Жамият
Сиз сўнгги марта қачон тиббий текширувдан ўтдингиз?
11:11 / 24.07.2017 18664 Жамият
Жаҳонгир тўшакка михланиб қолмасин: 22 яшар йигит ана шундай бахтсизлик ёқасида
12:52 / 22.07.2017 90197 Жамият
Дунёнинг энг ғаройиб майнинг-фермалари суратларда
11:30 1011 Lifestyle
ProCab тақдимоти: ҳам фойдали маълумотлар, ҳам ёқимли совғалар улашилган анжуман
11:13 340 Жамият
БМТ бош котиби Форс кўрфази давлатларига баёнот билан чиқди
11:02 804 Жаҳон
Тест синовларига келмаган кузатувчилар билан асосий иш жойидаги меҳнат шартномаси бекор қилинади
10:44 3161 Жамият
1 август куни Тошкентда жамоат транспорти соат 4:30дан иш бошлайди 
10:26 2646 Жамият
ДТМ томонидан абитуриентларга махсус рухсатномалар 29 июлдан бошлаб берилади
Кўпроқ янгиликлар