«Бавария» жамоаси бош мураббийи Карло Анчелотти Хамес Родригеснинг «Реал»дан трансфер қилинганига муносабатини билдириб ўтди.

Ушбу италиялик мутахассисга журналистлардан бири колумбиялик футболчи Томас Мюллер ўрнига таклиф этилгани ҳақидаги гапларга изоҳ сўраб мурожаат қилган.

«Албатта, биз Хамесни Мюллер ўрнига таклиф этганимиз йўқ. Агар сиз шундай ҳисоблаётган бўлсангиз, уни Тьяго ўрнига келган деб ўйлашингиз ҳам мумкин, бу икки футболчининг амплуаси бир хил - майдон маркази. Хамес ўнг қанотда ҳам, чап қанотда ҳам ўйнай олади, демак у Роббен ёки Рибери ўрнига келган бўлиши ҳам мумкин.

Биз Хамесни у кимнидир алмаштириши учун эмас, жамоани тўлдириши учун олиб келдик. У яхши футболчи, ўйлайманки, унинг бизга ёрдами тегади. Хамес фақат муносиб ишласа, майдонга туширилиши ҳақида билади, агар яхши меҳнат қилмаса, унинг жойи захира ўриндиғида бўлади. Ҳеч кимга асосий таркибда жой кафолатланмаган», — дея Анчелоттининг сўзларини келтирган Daily Mail.

«Бавария» ушбу футболчини икки йилга «Реал»дан ижарага олди, унинг ижараси учун 10 миллион евро тўланади.