Ўзбекистон Республикаси Президенти Шавкат Мирзиёев жойларда амалга оширилаётган ижтимоий-иқтисодий ислоҳотларнинг бориши, бунёдкорлик ишлари билан танишиш, халқ билан мулоқот қилиш мақсадида 7-8 июль кунлари Наманган вилоятида бўлганди. 

Президентнинг фейсбукдаги расмий саҳифасида ушбу сафардан фоторепортаж тақдим этилган.

Шавкат Мирзиёев ташрифнинг биринчи куни вилоят ижтимоий-иқтисодий ҳаётида амалга оширилаётган ўзгаришлар, кенг кўламли бунёдкорлик ишлари, истиқболли лойиҳалар билан танишди, халқ билан мулоқот қилди. 

Ташрифнинг иккинчи куни президент Наманган туманидаги Merrymed Farm масъулияти чекланган жамиятида бўлди. 

Шавкат Мирзиёев Наманган шаҳрининг Ислом Каримов кўчасида ташкил этиладиган маданият ва истироҳат боғи лойиҳаси билан таништирилди. 

Давлат раҳбари шаҳарнинг Уйчи кўчасини ободонлаштириш, инфратузилмасини такомиллаштириш, реконструкция қилиш борасида амалга оширилаётган ишлар билан танишди. Мазкур кўчада ўн бешта кўп қаватли турар жой биноси ва ўндан зиёд инфратузилма объекти қурилмоқда. Ўтган йилнинг кузида ушбу кўчада Наманган шаҳар 2-болалар ва ўсмирлар мактабининг замонавий биноси фойдаланишга топширилган. Иккита ёпиқ спорт зали ва бошқа зарур хоналарга эга бўлган мажмуада спортнинг кўплаб турлари билан шуғулланиш учун имконият яратилган. 

Президент 2-болалар ва ўсмирлар спорт мактабида машғулотларда қатнашаётган бадиий гимнастикачи қизлар ва боксчи ёшлар билан мулоқот қилди.