Америкада Tesla компанияси ишлаб чиққан ва муқобил бошқарувда ҳаракатланаётган электромобиль иштирокида яна бир ЙТҲ рўй берди. Миннесота штатида содир бўлган автофалокат сабабли 5 киши жабрланган. 

Star Tribune газетасининг ёзишича, автомобилнинг ҳайдовчи ўриндиғида ўтирган Дэвид Кларкнинг Tesla электрокари муқобил ҳаракатда бўлган. Унинг таъкидлашича,  машина ҳаракатланаётган вақтда кутилмаганда "тезликни оширган", натижада йўл четига чиқиб кетган. Шундан сўнг, электромобиль йўл ёқасидаги ботқоқликка ағдарилиб кетган. 

Машинада 4 нафар йўловчи бўлган. Улар ва ҳайдовчи жароҳат олган. Полиция ҳодиса юзасидан текширув ўтказишини билдирган. 

Кларк суд орқали товон пули олиш режасини инкор этмаяпти. Ўз навбатида, Tesla томонидан тарқатилган хабар ҳайдовчи сўзларини шубҳа остига қўймоқда. Компанияга кўра, бу воқеада ЙТҲ содир бўлмасдан аввал муқобил бошқарув функцияси нотўғри ишлаган "деб ҳисоблашга сабаб йўқ". 

Агар фалокатга электроника сабаб бўлгани аниқланса, бу Tesla компаниясига навбатдаги зарба бўлади. Бундан аввал, 2016 йил майида Флорида штатида рўй берган автоҳалокатда ҳайдовчи вафот этган эди. Ўшанда, муқобил бошқарувдаги Tesla электроникаси очиқ ҳавода қуёш томонидан ёрқин ёритилган ва перпендикуляр ҳаракатланаётган оқ трейлерни фарқлай олмаган.

Бундан ташқари, Монтана ва Пенсильвания штатларида ҳам ушбу электрокар иштирокида ЙТҲлар содир бўлган. Уларда инсонлар ўлими қайд этилмаган.