Ўзбекистон президенти Шавкат Мирзиёев 17 июль куни Ўзбекистон Республикаси парвозларнинг хавфсизлигини назорат қилиш давлат инспекцияси фаолиятини такомиллаштириш чора-тадбирлари тўғрисидаги қарорни имзолади.
 
Ҳужжатда таъкидланишида, парвозлар хавфсизлигининг назорат қилиш давлат инспекциясининг ҳозирги ташкилий тузилмаси ва штат бирлиги авиация ходимларини лицензиялаш ва эксплуатация инспекцияларини ўтказиш бўйича алоҳида функцияларни тўла ҳажмда бажариш имконини бермаяпти.
 
Қарор билан Ўзбекистон Республикаси парвозларнинг хавфсизлигини назорат қилиш давлат инспекциясининг янги вазифалари белгиланди:
 
- фуқаролик ва тажрибавий авиация фаолияти соҳасида давлат сиёсатини амалга ошириш;
 
- Ўзбекистон Республикаси ҳаво ҳудудидан унинг фойдаланувчилари хавфсиз фойдаланишини таъминлаш;
 
- фуқаролик авиацияси ва унинг Ўзбекистон Республикасидаги объектларининг хавфсиз ишлашини таъминлаш;
 
- фуқаролик авиацияси фаолиятининг парвозлар хавфсизлигини таъминлаш бўйича сертификация ишларини ташкил этиш ва таъминлаш;
 
- ҳаво ташувлари билан боғлиқ бўлган аэропортларда ҳаво кемаларига хизмат кўрсатиш бўйича фаолиятни лицензиялашни ташкил этиш;
 
- фуқаролик ва тажрибавий авиация фаолияти соҳасида давлат назоратини амалга ошириш, авиация ҳодисалари ҳамда фуқаролик ва тажрибавий ҳаво кемалари билан ҳолатларни суриштирувдан ўтказиш;
 
- Ўзбекистон фуқаролик авиацияси манфаатларини халқаро ташкилотларда тақдим этиш.
 
Шунингдек, Дававианазорат тузилмасида янги бўлимлар пайдо бўлади. Улар:
 
- учувчисиз учар қурилмалардан фойдаланишни ҳисобга олиш ва назорат қилиш бўлими, 3 штат бирлигида;
 
- хорижий эксплуатантларнинг эксплуатация инспекцияси бўлими, 3 штат бирлигида.
 
Бундан ташқари, эндиликда Дававианазорат бошлиғи мақом бўйича вазирнинг биринчи ўринбосарига тенглаштирилади.