Вашингтондагилар мамлакат президенти Дональд Трамп ва Россия президенти Владимир Путин ўртасида 7 июль куни Ҳамбургдаги «Катта йигирмалик» саммити доирасида давлат раҳбарларининг кечки овқат вақтидаги учрашувини тўлақонли учрашув, деб билмайди. Бу ҳақда Оқ уй вакилига асосланган ҳолда Reuters агентлиги хабар тарқатган.

Америкалик амалдор бу икки сиёсатчининг учрашувини «атиги қисқа мулоқот», деб баҳолаган.

«Президент Трамп ва Путин ўртасида ҳеч қандай «иккинчи учрашув» бўлмади. Улар кечки овқатдан кейин қисқагина суҳбат қуришди. Оқ уй иккинчи учрашув бўйича фактларни яширишга уринаётгани ҳақидаги гаплар ёлғон», дея президент маъмурияти сўзларини келтирган агентлик. 

У Путин ва Трампнинг кечки овқатдан кейинги суҳбатига гувоҳ бўлгани, бу суҳбатда фақат россиялик таржимон қатнашганини маълум қилган. Америкаликлар таржимони бўлмаганини у таржимон русча билмагани билан изоҳлаган.

18 июль куни Reuters агентлиги саммит вақтида Путин ва Трамп яна бир марта учрашгани, аммо бу ҳақда ОАВда айтилмагани ҳақида хабар тарқатди. The Washington Post президентлар 7 июль куни кечки овқатдан кейин яна учрашишгани, уларнинг бу учрашуви бир соатга яқин вақт давом этгани ҳақида ёзиб чиқди.

Икки президент G20 саммитининг биринчи кунида учрашиб, 2 соату 15 дақиқа давомида мулоқот қилганди. Трамп ва Путин икки давлат муносабатларини ҳамда халқаро кун тартибида турган долзарб мавзуларни муҳокама қилишганди. Бу учрашувда Сурияда ўт очишни тўхтатиш бўйича келишувга эришилганди.