Ўзбекистон ҳукумати 2017 йилнинг иккинчи чорагида халқаро молиявий институтлар ва донор давлатлар билан 413,04 млн долларлик тўртта кредит келишувини имзолади. Лойиҳаларнинг умумий қиймати 470,24 млн долларни ташкил этади. Бу ҳақда Uzdaily.uz хабар бермоқда.

Ўзбекистон ва Жаҳон банки “Олий таълим муассасалари моддий-техник базасини мустаҳкамлаш” лойиҳаси бўйича кредит келишувини имзолади. Лойиҳа қиймати 72,95 млн доллар, кредит эса - 42,2 млн долларга тенг.

Ислом тараққиёт банки “Қишлоқ жойларда замонавий турар-жойларни қуриш” лойиҳаси учун 300 млн доллар ажратди.

Бундан ташқари, Ўзбекистон Ислом тараққиёт банки билан “Олий таълим муассасалари моддий-техник базасини мустаҳкамлаш” лойиҳасини амалга оширмоқда. Лойиҳа қиймати - 44,48 млн доллар бўлиб, банк маблағлари ҳисобидан тўла ҳажмда молиялаштирилмоқда.

Саудия тараққиёт жамғармаси “Косон ва Муборак туман марказлари ҳамда Китоб-Шаҳрисабз ер ости сувларига яқин жойлашган аҳоли пунктларининг сув таъминоти тизими реконструкцияси” лойиҳасини амалга ошириш учун 26,36 млн долларлик ҳажмда кредит тақдим этди. Лойиҳа қиймати 52,81 млн долларга тенг.