Россиянинг «Билайн» операторига эгалик қилувчи Veon ҳолдинги Россия, Грузия, Покистон, Украинада шу ном остида мессенжер ишга туширилганини маълум қилди. Италияда мессенжер ҳафта охиригача ишга туширилиши кутилмоқда. Сервисда бепул қўнғироқлар, янгиликлар тасмаси ва фойдаланувчилар учун махсус таклифлар йиғиндиси бор.

Компания хабарида айтилишича, Veon мессенжерида шахсий ва гуруҳда ёзишмаларни амалга ошириш, бепул қўнғироқ қилиш, шунингдек, янгиликлар, мусиқа ва видео тасмасини тузиш мумкин. Ҳолдингга кирувчи тармоқлар абонентлари Veon’дан ҳисобда маблағ қолмаганда ҳам фойдаланиши мумкин.

Иловада кафе ва кинотеатрлар каби жойлардан махсус таклифлар ҳам бор. Шунингдек, мессенжердан фойдаланиш учун бонуслар назарда тутилган. Янги фойдаланувчи 1 гигабайт трафикни олади, таклиф этилган дўст учун ҳам шунча берилади. Сервисга ҳар кунлик ташриф учун 100 МБ берилади.

Veon Google Play’да пайдо бўлди, бироқ ҳозирча уни юклаб олиш имконсиз. App Store учун нусха ҳозирча йўқ: мессенжер яратувчилари уни кейинроқ ишга тушириш ҳақида ваъда беришган, бироқ аниқ муддатлар номаълум.