Ўзбекистон президенти Шавкат Мирзиёев 2017 йилнинг 19 июль куни “Самарқанд шаҳрида қаттиқ маиший чиқиндиларни бошқаришнинг модернизацияси” лойиҳасини амалга ошириш бўйича чора-тадбирлар тўғрисида”ги қарорни имзолади.

Ҳужжат билан Самарқанд шаҳрида қаттиқ маиший чиқиндиларни бошқаришнинг модернизацияси лойиҳасини амалга ошириш бўйича чора-тадбирлар тасдиқланди. Лойиҳа Франция тараққиёт агентлиги иштирокида амалга оширилади.

Ҳужжатга мувофиқ, Самарқанд ҳокимияти ҳузуридаги Maroqand Obod давлат унитар корхонаси лойиҳани амалга оширади. Кредит ва грантлардан мақсадли ҳамда самарали фойдаланиш, шунингдек, лойиҳага ажратилган кредитларни қоплаш вазифалари Maroqand Obod зиммасига юкланди.

Лойиҳани амалга ошириш муддати 5 йил – 2017 йилдан 2021 йилгача. Лойиҳа доирасида янги биореактор-полигон ташкил этилади, у ерда биогазни ушлаб қолиш ва фойдаланиш бўйича янги тизимлар ўрнатилади.

Эслатиб ўтамиз, 2016 йилнинг 19 декабрь куни Франция тараққиёт агентлиги билан Самарқанд шаҳридаги қаттиқ маиший чиқиндиларни бошқаришни модернизация қилиш лойиҳаси доирасида қиймати 23,5 миллион АҚШ долларилик кредит битими имзоланди. Унинг ёрдамида қаттиқ маиший чиқиндиларни қайта тиклаш ва қайта ишлаш тизимини такомиллаштириш орқали Самарқанд шаҳрида қаттиқ маиший чиқиндиларни бошқариш тизимини модернизация қилиш имкони яратилади.