Туркиянинг Anadolu агентлиги Американинг Суриядаги ҳарбий базаларининг жойлашуви ҳақидаги маълумотларни эълон қилди

Бундай маълумотлар АҚШ президенти Дональд Трамп суриялик курдларга қурол-яроғ етказиб беришни маъқуллагач, Вашингтон ва Анқара ўртасидаги муносабатлар совуқлашганидан сўнг ОАВда пайдо бўлди.

Агентлик маълумотларига кўра, Ал-Ҳасака вилоятидаги Рмайлан туманидаги икки авиабаза 2015 йилдан буён фаолият кўрсатиб келмоқда. 2016 йилнинг мартида Айн-ул-Араб шаҳрининг Ҳараб-Иск туманида вертолётлар жойлаштириш учун база ташкил этилган, у ҳам суриялик курдларга ҳарбий мадад берувчи йўналишлардан биридаги юк тушириб ортиш пункти ҳисобланади.

Бундан ташқари, Ал-Ҳасака вилоятида жойлашган яна учта база санаб ўтилган. Улардан бирида юзга яқин, бошқасида бир юз элликка яқин америкалик ҳарбий жойлаштирилган. Бу базалар ИШИДга қарши кураш учун йўналтирилган, дейилади. Яна икки пункт Манбиж шаҳрида жойлаштирилган бўлиб, улар Сурия озод армиясига қарши операциялар ўтказишади. Шунингдек, Раққа вилоятининг шимолида ҳам учта база борлиги таъкидланган.

Уларнинг иккитасида нафақат америкалик, балки француз ҳарбийлари ҳам жойлаштирилган. Учинчиси суриялик курдларга қурол-аслаҳа етказиш билан, шунингдек, коалиция кучлари алоқа маркази ва ИШИД жангариларининг коммуникацияларини вайрон қилиш базаси сифатида фаолият кўрсатади, дейилади мақолада.

Агентликнинг таъкидига кўра, Америка кучларининг таянч пунктлари «ёпиқ зона» сифатида белгиланган ва махфийлаштирилган. Базадаги ҳарбий хизматчилар авиазарба ва артиллерия зарбаларини ўтказиш учун алоқаларни таъминлаб туришади, маҳаллий кучларни тайёрлайди ва оператив режалаштириш ўтказади. Ўша ерда фаол жанговар ҳаракатлар олиб борувчи бўлинмалар ҳам жойлаштирилган.

Агентлик маълумотига кўра, базалар юқори манёврли артиллерия батареялари, бараварига ўт очиш реактив тизимлари, разведка учун мобил ускуналар, зирҳли машиналар, хусусан, Stryker’лар билан таъминланган.

Хабар қилинишича, Бевосита ҳарбий таянч пунктларидан ташқари, АҚШ ўз аскарларини уларни топиш мушкул бўлган жойларга: турар-жой ҳудудларига, «Демократик иттифоқ» лагерларига, оператив нуқтага осонгина айлантириш мумкин бўлган фабрикаларга жойлаштирмоқда.

Пентагон АҚШнинг Сурияда жойлашган ҳарбий базалари ҳақидаги маълумот ошкор этилганидан ташвишда эканлигини билдирган. «Бу АҚШ бошчилигидаги коалициянинг ИШИДга қарши ҳаракатларига халақит бериши мумкин», — деган Пентагон вакили Эрик Пэҳон.

«Оператив хавфсизлик важлари туфайли биз Сурияда ИШИДни йўқ қилиш борасида операциялар ўтказаётган коалиция кучларининг жойлашуви ҳақидаги маълумотларни ошкор этмаймиз», — деган Пэҳон. «Нозик ҳарбий маълумотларнинг чоп этилиши коалиция кучларини кераксиз таҳдид остига қўяди ва ИШИДни йўқ қилиш юзасидан олиб борилаётган операцияларни барбод қилиши мумкин», — дея қўшимча қилган у.

Туркия ва АҚШ ўртасидаги муносабатлар Трампнинг яқиндаги, ИШИДга қарши курашаётган суриялик курдларга қурол-яроғ етказиб бериш ҳақидаги қароридан сўнг совуқлашган. Туркиянинг расмий позициясига кўра, Суриядаги курд жангарилари ҳам Анқара, ҳам Вашингтон томонидан террорчилик ташкилоти, дея тан олинган Курдистон ишчи партияси (КИП) га алоқадор.