Жорий йил 20 июль куни Халқаро бизнес марказида Ўзбекистон ва Афғонистон делегациялари ўртасида учрашув бўлиб ўтди. 

Музокаралар кун тартибига қўйилган асосий масалалар савдо-иқтисодий ҳамкорликни кучайтириш, Ўзбекистон маҳсулотларини Афғонистонга етказиб беришни кўпайтириш ва бу тизимни яхшилаш каби мавзулар бўлди. Бу ҳақда «UzTrade» АЖ матбуот хизмати маълум қилди. 

Анжуман доирасида «UzTrade» АЖ раҳбарияти Афғонистон бизнес делегацияси вакиллари билан музокаралар ўтказди. Унда Ўзбекистон маҳсулотларини қўшни давлатга экспорт қилиш ҳажмини ошириш мавзусида фикр алмашилди. 

Ўзбекистон Ташқи савдо вазирлиги ҳузуридаги «UzTrade» АЖ халқаро ташқи савдо компанияси бўлиб, кичик ва хусусий тадбиркорлик субъектлари, деҳқон ва фермер хўжаликларининг маҳсулотларини экспорт қилишга кўмаклашиш, шунингдек, Ўзбекистон Республикасида ишлаб чиқарилаётган маҳсулотлар учун янги бозорларни топиш ва ўзлаштириш мақсадида ташкил этилган. 

Бугунги кунда «UzTrade» АЖ доимий тартибда Афғонистонга республикада ишлаб чиқарилган турли хил саноат ва озиқ-овқат маҳсулотларини етказиб бермоқда. 

Афғонистон бозоридаги ўрнини мустаҳкамлаш ва экспорт маҳсулотлари етказиббериш ҳажмини ошириш мақсадида Мозори Шарифда барпо этилаётган Ўзбек-Афғон қўшма савдо уйини ташкил этиш ишларини тезлаштириш масалалари ҳам учрашув чоғида кўриб чиқилди. 

Савдо уйи фаолияти доирасида доимий асосда ишлайдиган кўргазмалар хонаси бўлади. Унда ўзбекистонлик ишлаб чиқарувчиларнинг истеъмол ва озиқ-овқат маҳсулотлари намойиши йўлга қўйилади. Хусусан, кондитерлик маҳсулотлари, печенье, шоколадли конфетлар, паста, табиий мевалардан тайёрланган мурабболар, соклар, сув, ичимликлар, гўшт ва консерва маҳсулотлари, кимё саноатининг турли ашёлари, қурилиш материаллари, хўжалик техникаси, гиламлар ҳамда бошқа маҳсулотлар намойиш этилади.