Француз авиакомпаниясининг алоҳида таъкидлашича, янги авиаташувчи лоукостер ҳисобланмайди, чунки парвоз вақтида йўловчиларга «оригинал маҳсулотлар ва хизматлар» тақдим этилади, деб хабар беради ТАСС.

Франциянинг Air France флагман Joon бюджетли авиаташувчи компаниясини ташкил этишга қарор қилди. Бу ҳақда пайшанба куни компания сайтида эълон қилинган баёнот орқали маълум қилинган.

«Joon лоукостер (ўта арзонлаштирилган, салонда хизматлар кўрсатилмайдиган авиақатнов) бўлмайди, чунки Air France’нинг бошқа рейслари каби бортда оригинал маҳсулотлар ва хизматлар тақдим этилади», — дейилади ҳужжатда.

Таъкидланишича, Joon’ни очиш қарори 18 ёшдан 35 ёшгача бўлган мижозларни жалб қилиш мақсадида қабул қилинган. Бу ёш тоифасига мансуб йўловчилар паст бюджетли авиакомпаниялар хизматидан фаол фойдаланишади. Air France эса қиммат бўлмаган парвозлар таклиф қилаётган компаниялар томонидан рақобатни борган сари кўпроқ ҳис қилмоқда.

Joon авиакомпанияси Париждаги Шарль-де-Голль аэропортидан ўрта масофаларга парвозни кузда бошлайди. 2018 йилнинг ёзида узоқ масофаларга тўртта рейс очиш мўлжалланмоқда.