Россия давлат думаси жума кунги йиғилишда мессенжерлар фаолиятини тартибга солувчи қонунни учинчи якуний ўқишда қабул қилди. Бу ҳақда “Интерфакс” хабар бермоқда.

Қонун билан "мессенжер" тушунчаси киритилмоқда, шунингдек, бундай сервислар учун мажбуриятлар белгиланди.

Хусусан, мессенжерлар Россия ахборот технологиялари устидан назорат қилиш хизмати талабига кўра, бир сутка ичида қонун билан тақиқланган маълумотга эга хабарларни фойдаланувчига етказиб беришни тўхтатиб қўйиш мажбуриятини олди. Сервислар давлат органлари ташаббуси билан ва РФ қонунчилигига мувофиқ электрон хабарларни узатиш имкониятини таъминлаб бериши лозим.

Қонун фақатгина мессенжер операторларига нисбатан санкцияларни назарда тутади, бу агарда улар қонун бузилишига йўл қўйишса, рўй беради. Фойдаланувчиларга нисбатан жарималар ёки тўғридан-тўғри тақиқ қўлланилмайди. 

Шу билан бирга, мессенжерлар операторлари фойдаланувчилар шикоятига кўра, спамнинг тарқалишини тўсиб қўйиши лозим. Мессенжерларнинг ўзидан фойдаланишга тақиқ фақатгина суд қарори асосида чекланиши мумкин. Янги қонунга кўра, мессенжер фойдаланувчиларнинг абонентлик рақами ҳақидаги маълумотларни, фақатгина уларнинг розилиги билан учинчи шахсларга тақдим этиши мумкин.