Ўзбекистон Президенти Шавкат Мирзиёевнинг Тошкент вилоятига амалга оширган ташрифи доирасида вилоят ҳудудидан ўтувчи Тошкент—Сирдарё автомобиль йўли бўйида қурилиши мўлжалланган янги турар жойлар, ижтимоий соҳа объектлари лойиҳалари билан танишди. Бу ҳақда ЎзА хабар берди.

Зангиота, Чиноз ва Янгийўл туманлари ҳудудидан ўтувчи йўл бўйида 1, 2, 3, 4 хонали уй-жойлар қурилиши ва жойлашуви лойиҳаси тақдимоти ўтказилди. Лойиҳаларда уй-жойларнинг жойлашув схемаси, кўриниши, дизайни ўз аксини топган.

«Шу кунгача Тошкент вилоятининг маъмурий маркази йўқ эди. Бугун бу ишга киришмасак эртага кеч бўлади», — деди Президент. Давлат раҳбари Тўйтепа шаҳрини вилоятнинг маркази сифатида қайта қуриш тадбирлари амалга оширилаётгани, бу борада хориждан архитекторлар таклиф қилинганини таъкидлади.

Президент лойиҳа билан танишар экан, Тошкент—Тўйтепа йўли атрофида замонавий уй-жойлар қуриш, ижтимоий соҳа объектларини замон талаблари даражасида барпо этиш бўйича кўрсатмалар берди.

Бугун Тўйтепа катта қурилиш майдонига айланган. Тошкент вилоятининг маъмурий марказига айланган шаҳарда кенг кўламли қурилиш ишлари олиб борилмоқда. Тўйтепа шаҳрининг бош режаси тақдимоти ҳам ўтказилди. Режа бўйича уй-жойлар, маъмурий бино ва иншоотлар қурилишида биноларнинг ташқи кўриниши ва дизайнига алоҳида эътибор қаратилган.

Тўйтепа шаҳрида жойлашган Тошкент вилояти ҳокимлиги биносида Шавкат Мирзиёев раислигида вилоят фаоллари йиғилиши бўлиб ўтмоқда.