Қатарнинг BeIN Sports (собиқ Al Jazeera Sports) телеканали БААдаги миллий интернет провайдерларидан бирининг мижозлари учун телеканаллар рўйхатига киритилди. Бу ҳақда The National нашри ёзмоқда.

Аввалроқ, БАА Қатар билан дипломатик муносабатларни узганидан кейин ушбу телеканал сайтига кириш тўсиб қўйилган эди. Бундан ташқари, унинг трансляцияси ва обуна бўлиш тақиқланганди. BeIN Sports телеканали минтақага жаҳон футболи мусобақаларини эфирга узатади. 

Нашрнинг ёзишича, провайдер телеканал обуначилар учун яна очиқ эканини тасдиқлаган. Обуначиларнинг ўзлари ҳам ижтимоий тармоқлар орқали бир ойдан ортиқ муддат кўрсатувлари намойиш этилмаган телеканал ишлаётганини ёзишган.