«Челси» жамоасининг расмий сайтида жамоа ярим ҳимоячиси Роберт Кенедининг ҳақоратомуз пости туфайли Хитой халқидан узр сўради.

ОАВдаги маълумотларга кўра, 21 ёшли футболчи «Арсенал»га қарши Пекинда бўлиб ўтган ўртоқлик учрашуви вақтида ҳуштакбозликка учраганди.

Бунга у «Инстаграм»даги саҳифасида иш жойида ухлаб қолган хитойлик қўриқчи устидан кулиб, хитойликларнинг ҳамиятига теккани сабаб бўлган.

«Челси» футбол клуби Хитой халқидан футболчининг ижтимоий тармоқдаги ҳақоратомуз пости учун узр сўрайди. 22 июль куни клуб хитойлик мухлислар томонидан илиқ ва дўстона қарши олинди. Аммо биз ёш футболчиларимиздан бири Кенедининг ижтимоий тармоқдаги постидан ҳайронмиз, у бу иши орқали хитойликларнинг туйғуларини ҳақоратлаган.

Футболчимиз бу постини тезда ўчирган ва узр сўраган бўлсада, афсуски, ижтимоий тармоқларда бу ҳодиса кенг тарқалиб кетди. «Челси» бу ҳолат учун узр сўрайди. Кенедининг ҳаракати хато эди, унинг ҳаракати бутун жамоа футболчилари ёки клубнинг позициясини билдирмайди. Кенедига қатъий танбеҳ берилди», — дейилган лондонликлар клуби расмий сайтидаги инглиз ва хитой тилларида келтирилган мурожаатда.

Кенедининг ўзи ҳам расман узр сўраган.

«Мен ўзини ҳақоратланган сезган хитойлик кишилардан узр сўрамоқчиман.Мен кимнидир камситиш ёки хафа қилиш ниятида бўлмаганман, аммо энди кўрмоқдаманки, бу ҳазил бошқача тушунилди. Айтишни истардимки, хитойликлар ва бу мамлакатни чуқур ҳурмат қиламан.

Мен шунингдек, «Челси»дан ва жамоадошларимдан уларни ноқулай аҳволда қолдирганим учун узр сўрайман», — дея ёзган Кенеди ўз «Инстаграм»ида.