Ўзбекистон Республикасининг инвестициялар бўйича Давлат қўмитаси ва «Сименс» компанияси англашув меморандумини имзолади. Бу ҳақда Германия компанияси матбуот хизмати хабар қилган.

Ҳужжат Берлиндаги немис-ўзбек бизнес-форуми доирасида имзоланди. Тадбирда инвестициялар бўйича Қўмита раиси Азим Аҳмадхўжаев ва «Сименс»нинг Ўзбекистондаги директори Искандар Бўронов иштирок этган.

Томонлар ҳужжат доирасида энеретика, саноат, транспорт инфратузилмасининг модернизацияси, бинолар хавфсизлиги ва автоматлаштирилиши, ишлаб чиқаришда рақамли тизимни жорий этиш каби йўналишлар бўйича стратегик шерикликни ўрнатиш ниятида.

Ҳужжатга кўра, Ўзбекистон энергетикасининг ривожланиш сценарийларини тайёрлаб бориш режалаштирмоқда. Бунда инновацион технологияларни жорий этиш, иш ўринларини яратиш, маҳсулотларни маҳаллийлаштириш ва экспортга асосий урғу берилади.

Шунингдек, томонлар ёш муҳандислар ва ихтисослаштирилган ўқув муассасалари битирувчиларига «Сименс» компанияси энергетик қурилмаларида ишлашга оид комплекс дастур бўйича таълим бериш имкониятларини кўриб чиқади.

Саноатни рақамлаштириш соҳасида Ўзбекистон корхоналарида «рақамли ишлаб чиқариш» концепциясига жавоб берувчи замонавий технологияларни жорий этиш имконияти ўрганиб чиқилади.

Инновацион қарорларнинг қўлланилиши темир йўл транспорти соҳасига ҳам тегишли бўлади. Томонлар тақсимлаш станцияларини ташкил этиш, шунингдек, темир йўл инфратузилмасини автоматлаштириш ва электрлаштириш бўйича лойиҳаларни биргаликда ишлаб чиқишни режалаштирмоқда.