Бугун Ўзбекистон Республикаси бош вазири Абдулла Арипов раислигида умумий видеоселектор мажлис бўлиб ўтмоқда. Мажлисда президентнинг «2017-18 ўқув йилида Ўзбекистон Республикаси олий таълим муассасаларига қабул тўғрисида»ги қарори ва «Ўзбекистон Республикаси Қуролли кучларини ислоҳ қилиш ва янада ривожлантириш вазифаларини амалга ошириш бўйича чора-тадбирлар дастури тўғрисида»ги қарори ижроси бўйича вазият муҳокама этилмоқда.

Кун.uz мухбири маълумот беришича, мажлисда бош вазир Давлат тест маркази вакили сифатида жалб қилинган бинолар, қаватлар, аудитория раҳбарлари ва кузатувчилари бириктирилган таълим муассасасига биносига соат 6:30да паспорти билан етиб келмаса, ушбу аудитория раҳбари ҳамда кузатувчисининг асосий иш жойидаги меҳнат шартномаси бекор қилиниши ҳақида маълум қилган. Бундай чора тест синови ўтказиладиган бинога ортиқча буюмларни олиб кирилиши, жавоблар варақаси пакетига солинадиган тест материаллари тўлиқ бўлмаслиги, тест синовлари жараёнида абитуриентларга луғат, жадвал, китоб, уяли телефон, шпаргалкалардан фойдаланишига, тест давомида тест материалларини бошқа абитуриентга узатишга, абитуриентларга ёрдам беришга, саволлар китоби, варағини йиртишга шароит яратиб берганида ва мазкур ҳолат бўйича тегишли далолатнома расмийлаштирмаганида ҳам қўлланади.

«Агар келмайдиганлар бўлса, айтиб қўйинглар. Узрли сабабсиз келмайдиган бўлса, мана ўтган йили 10 фоиз келмаган, биз ўша асосий жойидан ҳам керак бўладиган бўлса меҳнат шартномасини бекор қиламиз. Шартномаси бекор қилиниши бўйича олдиндан огоҳлантириб қўйинглар», - деган Арипов.