Япониянинг Toyota автоконцерни бир неча дақиқа ичида қувватланувчи электромобиль яратмоқда. Бу ҳақда япон нашрларига иқтибос келтирган ҳолда Reuters ахборот агентлиги хабар бермоқда. 

Тахминларга кўра, электромобиль сотувга 2022 йилдан олдин чиқарилмайди. Машина ҳозирда электромобилларда ишлатилувчи литий-ионли батареялардан фарқли, қаттиқ жисмли батареяларда ишлайди. Бу эса қувватлаш вақтини анча тезлаштиришга имкон беради. Бироқ Toyota’да бу маълумотларга изоҳ беришни исташмади.

Toyota Хитойда 2019 йилдан электромобиллар ишлаб чиқармоқчи. Бу модель ҳозирда мавжуд C-HR модели негизида қурилади ва литий-ионли батареяларда ишлайди.

Электромобилларда қаттиқ жисмли батареяларни қўллаш соҳасидаги тадқиқотлар билан бирданига бир нечта компания, жумладан Жанубий Кореянинг Hyundai компанияси шуғулланмоқда. Бу батареялар литий-ионлиларга нисбатан анча самарали ва энергия сиғимдор ҳисобланади, бироқ ҳанузгача бирорта ҳам компания уларни электромобилларда қўллашга мослаштирмаган.    

Toyota ҳозирда бир нечта электроавтомобиллар ишлаб чиқармоқда: улар литий-ионли аккумуляторларда ишловчи ихчам шаҳар автомобилларидир.