26 июль куни пара-атлетика бўйича Лондонда бўлиб ўтган жаҳон чемпионатида иштирок этган ўзбекистонлик спортчилар ватанга қайтишди.

Лондонда 10 кун давом этган жаҳон чемпионатида найза отиш бўйича Александр Свечников, узунликка сакрашдан Дониёр Солиев, диск отишда эса Ҳусниддин Норбековлар олтин медаль соҳибига айланишди. Кумуш медаллар эса Нозима Қаюмова (диск отиш), София Бурхонова (ядро улоқтириш ва диск отиш) ҳамда Ҳусниддин Норбеков (ядро улоқтириш) ҳиссасига тўғри келди. Ўзбекистонлик спортчилар умумий ҳисобда 7 та медални қўлга киритишга муваффақ бўлишди.